ԺԱՄԱՆՑ

«Ինձ շատ էին մեղադրում, որ մարդկանց նեղ դրության մեջ եմ դնում». Արուս Տիգրանյանը` իր նոր հաղորդման և մարդկանց երազանքներն իրագործելու մասին

Լրագրող Արուս Տիգրանյանը, ով վերջին շրջանում հանդես էր գալիս նաև սիթքոմներում, վերդառնում է եթեր որպես լրագրող` միանգամից երկու նախագծով:

Загрузка...

Tert.am Life-ի հետ զրույցում Արուսը պատմել է, թե ինչ աշխատանքային նորություններ ունի, խոսել է նախորդ եթերաշրջանում էկրանին միայն որպես դերասանուհի լինելու պատճառի մասին, ինչպես նաև տրամադրել է իր նոր ֆոտոշարքը:

Նրա խոսքով` առաջին նախագիծը, որը սկսում է, լինելու է օնլայն` յութուբյան իր էջում: Այն կոչվում է «Սուր Արուս».  «Այն մարդկանց արդեն ծանոթ ֆորմատով է։ Ծանոթ ասելով նկատի ունեմ «Լավ Երեկո» հաղորդման շրջանակում «Արդարության հետքերով» ռեպորտաժների շարքը: Ուղղակի այս անգամ ռեպորտաժները լինելու են հիմնականում սպորտաային ուղղվածությամբ, ինչը կոմերցիոն նպատակ ունի, լինելու է գովազդ, ինչպես բոլոր նախագծերում: Ես գնալու եմ սպորտային տարբեր ակումբներ, սպորտով զբաղվեմ ու հարցազրույցներ վերցնեմ մարդկանցից: Խոստացել էի առաջին թողարկումը երեկ տեղադրել, բայց տեխնիկական խնդիրներ առաջացան, կտեղադրեմ այսօր երեկոյան»:

Երկրորդ նախագիծն «Արմենիա» հեռուստաընկերության եթերում կլինի սեպտեմբերից, այն Արուսի հեղինակային հաղորդումն է։

«Ինձ շատ էին մեղադրում, որ մարդկանց նեղ դրության մեջ եմ դնում, այս հաղորդումը լրիվ հակառակն է լինելու, այն հումանիստական է, մարդասիրական: Որոշ ժամանակ առաջ իմ էջում հայտարարություն տեղադրեցի և խնդրեցի, որ մարդիկ ինձ ուղարկեն իրենց երազանքները: Նրանք գրեցին և գրելու են ինձ իրենց ցանկությունները, երազանքները, նպատակները, որոնք ինչ-ինչ պատճառներով չեն կարողանում իրագործել,  ես դրանք իրականություն եմ դարձնելու,-ասաց նա և պարզաբանեց, որ իր թիմի հետ ներդնելու է բոլոր ռեսուրսները բացառությամբ մեկի` ֆինանսականի։ -Չի լինելու այնպես, որ մեկը գումար ցանկանա, մենք տրամադրենք: Լինելու է, օրինակ, մասնագիտական աճի խթանում, բնակարանի վերանորոգում, սիրելի երգչի հետ հանդիպում: Ձևաչափը լինելու է հումորային-ժամանցային-սոցիալական: Փորձնական նկարահանումներ արել ենք, բայց հիմնական նկարահանումները կսկսվեն օգոստոսի 10-ից»:

Հարցին, թե ի՞նչ սկզբունքով են ընտրելու հաղորդման հերոսներին, Արուսը պատասխանեց. «Իրականում հարյուրավոր նամակներ եմ ստացել: Չենք դիտարկել այն նամակները, որոնք հեռուստատեսային չեն, կապված են գումարի հետ: Շատերն են գրում, որ ցանկանում են հայտնի դառնալ, ինչը մի փոքր անհասկանալի երազանք է. չենք կարող բոլորին հայտնի դարձնել: Պետք է տարբեր երազանքներ ընտրենք, որ հաղորդումների սյուժեները տարբերվեն»:  

Արուսից հետաքրքրվեցինք, թե ինչո՞ւ նախորդ եթերաշրջանում հանդես չեկավ որպես լրագրող. «Չեմ դադարել լրագրող լինել, ուղղակի մի ընթացք եթերում որպես լրագրող չեմ երևացել: Նախորդ եթերաշրջանում տարբեր նախագծեր էինք նախատեսում իրագործել, որոնք կապված էին հանդիսատես ունենալու, ճամփորդության հետ: Համաճարակային իրավիճակի հետ կապված այդ նախագծերն իրագործել չստացվեց, գուցե հետագայում իրագործենք: Սովորեցինք ապրել այս համաճարակի հետ և անում ենք այնպիսի նախագծեր, որոնք թույլ է տալիս իրավիճակը»:

Զրույցի վերջում նա ասաց` չի բացառում, որ հետագայում կրկին կներկայանա սիթքոմներում, բայց հիմա կենտրոնացել է իր մասնագիտական գործունեության վրա:

Մարիամ Խաչատրյան

ԱՂԲՅՈՒՐԸ՝